Tónskóli Sigursveins með Erasmus+ vottun
Í maí 2024 hlaut Tónskóli Sigursveins vottun sem Erasmus+ skóli til ársins 2027. Með þessu hefur skólinn öðlast fullgilda aðild og er jafnframt staðfest að skólinn hafi unnið vandaða áætlun um fjölþjóðlegt samstarf og náms- og þjálfunarleiðir sem hluta af stefnumörkun til framtíðar. Þeir skólar sem fá þessa vottun staðfesta, munu hafa einfaldari aðgang að styrkjamöguleikum náms- og þjálfunarverkefna í nýrri menntaáætlun Erasmus+ 2021-2027. Í áætlun Tónskólans um alþjóðlegt samstarf er sett fram skýrt markmið: Að efla framúrskarandi hljóðfæranema í framhaldsdeild skólans á alþjóðagrundvelli. Þessum markmiðum verður náð með því að styrkja efnilega hljóðfæranema til þátttöku í alþjóðlegum tónlistarkeppnum.
Ágúst 2025 - Matvii sigrar í fyrstu alþjóðlegu píanókeppninni á Íslandi WPTA Iceland IPC25
Matvii sigrar í fyrstu alþjóðlegu píanókeppninni á Íslandi WPTA Iceland IPC25 - Vasyl og Chadman unnu til verðlauna fyrir 2. og 3. sæti”
“Erasmus+ nemendur Tónskólans Matvii Levchenko, Vasyl Zaviriukha og Chadman Naimi stóðu sig frábærlega í fyrstu alþjóðlegu píanókeppninni á Íslandi sem haldin var í Salnum í ágúst sl. undir merkjum WPTA Iceland. Matvii hlaut 1. verðlaun í yngri flokki og þeir Vasyl og Chadman fengu 2. og 3. verðlaun í eldri flokki. Alþjóðlega dómnefnd skipuðu Albert Mamriev, Mathias Halvorsen, Liam Kaplan, Peter Máté, Edda Erlendsdóttir og Erna Vala Arnardóttir. Forseti WPTA Iceland er Dr. Nína Margrét Grímsdóttir.
Ágúst 2025 - Viðtal við sigurvegara í yngri og eldri flokki fyrstu alþjóðlegu píanókeppninnar á Íslandi, Matvii Levchenko og Ásgerður Sara Hálfdanardóttir
Í viðtali við RÚV sjónvarpsfréttir 17.8. sl. ræða sigurvegarar í yngri og eldri flokki fyrstu alþjóðlegu píanókeppninnar á Íslandi, Matvii Levchenko og Ásgerður Sara Hálfdanardóttir um keppnisreynslu sína og flytja píanóverk á tónleikum sigurvegara í Salnum. Þau Matvii og Ásgerður Sara eru bæði nemendur dr. Nínu Margrétar Grímsdóttur verkefnastjóra Erasmus+ og deildarstjóri framhaldsdeildar Tónskóla Sigursveins.
Júní 2025 - Vasyl og Chadman léku í úrslitum 4th Samson International Piano Competition í Frakklandi
Vasyl og Chadman léku í úrslitum 4th Samson International Piano Competition í Frakklandi”
Nemendur Tónskólans í framhaldsdeild Vasyl og Chadman voru valdir í úrslit í 4th Samson International Piano Competition í Hippodrome í bænum Cagnes-sur-Mer, Frakklandi. Erasmus+ keppnisferðin var dagana 29. júní - 2. júlí 2025 og stóðu þeir Vasyl og Chadman sig mjög vel í flokknum Young Artists og uppskáru hrós og góðar leiðbeiningar frá alþjóðlegri dómnefnd þar sem sátu Nicolas Bringuier, Magdalena Hirsz, Florian Koltun, Congyu Wang, Giulino Adorno og Lorenzo Di Bella.
Maí - 2025 Viðtal við Morgunblaðið 31.5. dr. Nína Margrét Grímsdóttir
Í viðtali við Morgunblaðið 31.5. sl. fjallar dr. Nína Margrét Grímsdóttir, verkefnastjóri Erasmus+ og deildarstjóri framhaldsdeildar Tónskóla Sigursveins m.a. um frábæran árangur af styrkveitingu Erasmus+ til þjálfunar nemenda skólans á alþjóðasviði tónlistarkeppna
Apríl 2025 - Vasyl og Chadman léku af öryggi í úrslitum 3rd Junior Nordic Piano Competition í Svíþjóð
Vasyl og Chadman léku af öryggi í úrslitum 3rd Junior Nordic Piano Competition í Svíþjóð”
Erasmus+ keppnisferð Vasyl og Chadman var dagana 11. - 14. apríl 2025 þar sem þeir komu fram í sal Ingesund College of Music í bænum Arvika í Svíþjóð. Þeir stóðu sig frábærlega meðal fremstu norrænna ungra píanóleikara og hlutu lofsamleg ummæli dómnefndarinnar þar sem sátu Julia Mustonen-Dahlkvist, Mikael Kanarva, Sergejs Osokins, Tom Borrow og Gudrun Dahlkvist.
Apríl 2025 - Píanókennarar úr framhaldsdeild Tónskóla Sigursveins fóru í endurmenntunarferð
Píanókennarar úr framhaldsdeild Tónskóla Sigursveins fóru í endurmenntunarferð 28.3. - 2.4. 2025 á vegum Erasmus+ í Barratt Due tónlistarskólann í Osló. Í tónlistarskólanum fylgdist kennarahópurinn með kennslu hjá Marinu Pliassova sem er einn fremsti píanókennarinn á Norðurlöndum og hefur þjálfað marga nemendur til þátttöku í alþjóðlegum píanókeppnum undanfarin ár. Ennfremur var hluti ferðarinnar fundur með Torfinn Hoffart sellóleikara og yfirmanns Unge talenter deildar skólans. Að auki var kennurum Tónskólans boðið á hljómsveitartónleika þar sem nemendur skólans léku einleikskonserta. Var mjög áhugavert að kynnast þessu framsækna og metnaðarfulla skólastarfi í höndum fagfólks í píanóleik og þjálfun ungs afrekstónlistarfólks.
Mars 2025 - Franski píanóleikarinn Lorenzo Soulès heimsótti Tónskóla Sigursveins
Erlendur sérfræðingur, franski píanóleikarinn Lorenzo Soulès heimsótti Tónskóla Sigursveins dagana 10. - 12. mars 2025 og hélt masterklassa á vegum Erasmus+ fyrir þá nemendur sem tekið hafa virkan þátt í alþjóðlegum tónlistarkeppnum fyrir hönd skólans. Soulès sem á að baki glæsilegan feril þrátt fyrir ungan aldur hefur unnið til verðlauna í píanókeppnum, m.a. Concours international de piano d’Orléans og Concours International de Genève og var því mikill fengur að leiðbeiningum hans fyrir Erasmus+ nemendur Tónskólans.
Vasyl hlaut viðurkenningu í WPTA IPC Spáni 2025
Vasyl Zaviriukha hlaut viðurkenningu “Honorable Mention” í flokki Junior D í vefútgáfu Alþjóðlegu World Piano Teachers píanókeppninnar á Spáni í janúar 2025. Tónskóli Sigursveins óskar Vasyl og kennara hans dr. Nínu Margréti Grímsdóttur innilega til hamingju með árangurinn.
Erasmus+ nemendur Tónskólans auðga samfélagið með tónlist
Erasmus+ nemendur Tónskóla Sigursveins Chadman Naimi, Matvii Levchenko og Vasyl Zaviriukha hafa verið duglegir að auðga samfélagið með tónlistarflutningi sínum, þar má nefna þátttöku í masterklass og tónleikum í Tónskóla Mýrdalshrepps í september 2024, tónlistarflutningi við opnun málþings Menntavísindasviðs HÍ í október 2024, tónlistarflutningi á tónlistarhátíð íslenskrar píanótónlistar Slagharpan syngur í Salnum í nóvember 2024, tónlistarflutningi í Hörpu á tónlistarhátíðinn Unglist í nóvember 2024, tónlistarflutningi í Hörpuhorni á jólatónleikum Tónskólans, tónlistarflutningi á Degi heimstrúar á vegum Bahá´í samfélagsins á Íslandi í janúar 2025 og tónlistarflutningur í messu Laugarneskirkju í febrúar 2025.
Nóvember 2024 - Polstjärnepriset, Vänersborg, Svíþjóð
Vasyl Zaviriukha, 15 ára var valinn fyrir hönd Íslands til að taka þátt í alþjóðlegu píanókeppninni Polstjärnepriset í Vänersborg Svíþjóð. Keppnin er einungis opin annað hvert ár fyrir efnilega tónlistarnemendur í Skandinavíu og er eitt pláss í boði fyrir íslenskan tónlistarnema sem uppfyllir hæfniskröfur dómnefndarinnar en fjölmargir sækja um í Polstjärnepriset. Vasyl var valinn í keppnina sem skiptist í tvo hluta, fyrri hluti fór fram í nóvember 2024 og seinni hluti í janúar 2025. Í keppninni tók Vasyl þátt í masterklössum og kom fram á kammertónleikum í Folkets Hus salnum í Vänersborg ásamt nemendum frá Finnlandi og Svíþjóð og einleikstónleikum í Göteborg Konserthuset. Vasyl stóð sig frábærlega og var valinn til að leika 1. og 3. þátt úr tríói eftir Béla Bartók Kontrasts.
September 2024 - Göteborg Piano Festival, Svíþjóð
Vasyl Zaviriukha, 15 ára og Matvii Levchenko 13 ára tóku þátt í alþjóðlegri píanókeppni og tónlistarhátíð í Gautaborg Svíþjóð í september 2024 og stóðu sig frábærlega. Keppnin var opin nemendum í Skandinavíu og hlaut Vasyl 2. verðlaun í flokki C og Matvii hlaut 3. verðlaun í flokki B og voru þeir valdir til að koma fram á hátíðartónleikum í Göteborg Konserthuset. Tónskóli Sigursveins óskar þessum efnilegu píanónemendum og kennara þeirra dr. Nínu Margréti Grímsdóttur innilega til hamingju með árangurinn.
Ágúst 2024 - Music Festival Vienna Classis Stars - Vín, Austurríki
Chadman Naimi, 15 ára, Vasyl Zaviriukha, 15 ára og Matvii Levchenko 13 ára tóku þátt í alþjóðlegri píanókeppni og tónlistarhátíð í Vín Austurríki í ágúst 2024 og stóðu sig frábærlega. Af 30 þátttakendum frá 10 löndum hlaut Matvii 1. verðlaun og hlutu Chadman og Vasyl 2. verðlaun en hópurinn kom m.a. fram á vel sóttum tónleikum í Kleiner Ehrbar Saal og Bechstein Centrum í Vín. Tónskóli Sigursveins óskar þessum efnilegu píanónemendum og kennara þeirra dr. Nínu Margréti Grímsdóttur innilega til hamingju með árangurinn.
Júlí 2024 - Young Euregio Piano Award - Geilenkirchen, Þýskalandi
Vasyl Zaviriukha, 15 ára og Matvii Levchenko, 13 ára tóku þátt í alþjóðlegri píanókeppni í Geilenkirchen í Þýskalandi í júlí 2024 og stóðu sig frábærlega. Af 25 þátttakendum frá 13 löndum var Vasyl valinn í hóp 7 keppenda í lokaúrslitum flokki B og hlaut "finalist diploma” og Matvii var valinn í hóp 5 keppenda í lokaúrslitum flokki A og hlaut "finalist diploma special Jury mention". Tónskóli Sigursveins óskar þessum efnilegu píanónemendum og kennara þeirra dr. Nínu Margréti Grímsdóttur innilega til hamingju með árangurinn.
Erasmus+ piano students performance videos 2023-2025
Desember 2024
September 2024
Ágúst 2024
Janúar 2024
Desember 2023
Ágúst 2023